Kəsmikli banan

Bu gün bir çoxumuzun sevdiyi kəsmikli bananın hazırlanmas üsulunu sizə təqdim edirəm. Bu günlərdə hazırladığım bananlar dadına görə məni çoxlu tərif sahibi elədiyinə görə sizə də tez biz zamanda bişirməyi məsləhət bilirəm :)

Xəmir: 4  stəkan un, 200 qram kərə yağı, 200 qram xama (və ya qatıq), 1 paçka qabartma tozu, azca duz
İç: 2 paçka kəsmik, 100 qram kərə yağı, 1 stəkan şəkər, 1 stəkandan azca aşağı un və istəyə uyğun vanil tozu

İlk öncə xəmiri hazırladım. Xəmir ələ yapışmayan yumşaq olanadək yoğurdum və soyuducuya qoydum. Bu müddət ərzində içi hazır etdim. 

Xəmiri qozdan 1 azca böyük olaraq yumrulayıb kiçik kündələr düzətdim. Sonra onları yayıb içinə 1 xörək qaşığı kəsmikli qarışığdan yerləşdirdim və kənarlarını birləşdirdim (kənarları birləşən tərəf altda qalmalıdır). Xəmiri bumeranq formasına salıb 200 dərəcə öncədən isitdiyim sobada 15-20 dəqiqə müddətində bişməyə qoydum.

Bananlarım hazır oldu.

Nuş olsun!

Banan və manqo kokteyli

Yay fəslinin son günlərinə günəş rəngi qatacaq bir kokteyl var sırada. Çox ləzzətlidir, hazırlamağı tövsiyyə edirəm :)

Tərkibi: 1 kiçik manqo, 1 kiçik banan, 150ml süd, 120ml portağal şirəsi, 2 çay qaşığı limon suyu, 1 xörək qaşığı şəkər

Qabıqlarını soyub doğradığım banan və manqonu blenderə qoyub üzərinə portağal şirəsi, limon suyu və şəkəri əlavə edib 30 saniyə blenderin ən yüksək sürətində qarışdırdım.

Kokteyl hazır oldu.

Nuş olsun!

Qarğıdalılı kartof kotleti

Bu gün sizə tərkibinə qarğıdalı qatılmış ənənəvi kartof kotletini təqdim edirəm.

Tərkibi: 450 qram sürtgəcdən keçirilmiş kartof, 1 orta boy sürtgəcdən keçirilmiş soğan, 200 qram konservləşdirilmiş qarğıdalı, 50 qram un, 1 ədəd çırpılmış yumurta, 4 xörək qaşığı süd, tərəvəz yağı, duz və istiot

Dərin bir qabda unu, yumurtanı, südü, duz və istiotu yaxşıca qarışdırıb bir kənara qoydum. Sürtgəcdən keçirdiyim kartofu pambıq parçanın içinə qoyub parçanı hər iki tərəfdən (konfet kağızı formasında) sıxaraq kartofun acı suyunu çıxardım. Sonra kartof, soğan və qarğıdalını qarışığa əlavə edib qarışdırdım. 

Tərkibdən 1 xörək qaşığı isidib yağ vurduğum tavaya əlavə etdim. Kotletin hər iki üzü qızaranadək təxminən 3-4 dəqiqə bişirdim.

Nuş olsun!

Ətli rulet

Bu yaxınlarda anamın mənə öyrətdiyi bir təamı paylaşıram sizinlə.

Tərkibi: hərəsindən100 qram olmaqla çəkilmiş mal + qoyun + toyuq əti, xırda doğranmış 1 kiçik baş soğan, 1 yumurta, doğranmış 4 şampinyon göbələyi, 1 xörək qaşığı xardal, 1 dəstə doğranmış cəfəri, 2 xörək qaşığı xama, 2 xörək qaşığı duz + istiot, azca darçın və 2 iri lavaş

Dərin bir qabın içinə ətləri yerləşdirib onlara tərkibdə göstərilən bütün ərzaqları əlavə edib yaxşı qarışdırdım. Lavaşın içinə kərə yağı sürtüb əti yerləşdirdim və aşağıdakı kimi rulet formasında bükdüm. Sonra ruleti yarım saatlıq soyuducuya qoydum.

Vaxtın tamamında ruleti bir neçə hissəyə bölüb tavada isitdiyim zeytun yağında hər iki üzü yaxşı qızaranadək bişirdim.

Nuş olsun!

Zəfəranlı düyü pudinqi

Salamlar :) 

Uzun müddətdir ki, bloqumu yeniləmədiyimdən bir anlıq darıxdığımı hiss etdim və yenidən maraqlı reseptlərlə sizi tanış etmək üçün aşpazlıq qabiliyyətimi nümayiş etdirmək qərarına gəldim :)

Buyurun aşağıdakı Danimarka deserti ilə tanış olun:

Tərkibi: 600ml süd, 50qram yumru düyü, 2 xörək qaşığı şəkər, bir çimdik zəfəran, 25qram doğranmış badam, 1 yumurta, bir çimdik duz, kərə yağı və istəkdən asılı olaraq 40qram qara kişmiş

Südü altı qalın bir qazanda aşağı hərarətdə qaynatdım. Qaynadıqdan sonra ona duz və düyünü qatıb  ara-sıra taxta qaşıqla qarışdıraraq 10 dəqiqə bişməyə qoydum. Sonra üzərinə şəkər, 15qram otaq hərarətində ərimiş kərə yağı, zəfəran və badamı (kişmiş) əlavə edib tərkibi taxta qaşıqla bir neçə dəqiqə qarışdırdım. Yumurtanı ayrı bir qabda azca çırpıb südlü qarışığa əlavə etdim.

Sobya davamlı qabın içinə ərtidiyim azca yağı sürtüb qarışımı bura töküb və 200 dərəcə öncədən isidilmiş sobada bişməyə qoydum. Desert təxminən 25 dəqiqəyə və ya üzəri qızılı rəngdə olanda hazır oldu. Qeyd etmək lazımdır ki, pudinq isti halda servis olumalıdır.

Nuş olsun!    

Avokadolu kuskus salatı

Bu dəfəki seçdiyim təam soyuq qəlyanaltıdır. Buğdanın semolina adlnanan bir formasından hazırlanan kuskus Şimali Afrika ölkələrinin mətbəxindən dünyaya yayılmışdır. Spesifik dadlı kuskus əsas yeməklər üçün qarnir kimi çox məşhurdur.

Tərkibi: 1 stəkan kuskus, 1 kiçik avokado, 200qram toyuq filesi, 150 qram qara zeytun, duz

Kiçik bir qazanda 1 stəkan suyu qaynatdım və qaynadıqdan sonra suya duz qatıb qarışdırdım. Qazanı qazın üzərindən götürüb kuskusu əlavə etdim və qazanın ağzını örtüb 5-7 dəqiqə ərzində saxladım. Kuskus suyu tam özünə çəkdikdən sonra ona qaynadıb doğradığım toyuq filesi, avokado və zeytunları əlavə edib qarışdırdım.

Nuş olsun!

Hisə verilmiş qızıl balıq və qaymaqlı pasta

İtalyan mətbəxindən ləzzətli bir təam təqdim edirəm. Pastanın sosu fransızların créme fraiché adlandırdığı xamadan hazırlanır. Créme fraiché xamadan daha qatı olması ilə fərqlənir. Onu ev şəraitində də hazırlamaq mümkündür. Buyurun, bişirin və dadın :)

Tərkibi: 300 qram balıqqulağı formalı pasta , 200 qram fraiché qaymağı və ya xama, 2 bərk qaynadılmış yumurta, 200 qram hisə verilmiş qızıl balıq, holland pendiri, zeytun yağı, duz və istiot
(istəyə uyğun 1 xörək qaşığı xırda doğranmış şüyüd və təzə soğan)

Qazanda qaynayan suya duz və zeytun yağı qatıb pastanı əlavə etdim və 10-15 dəqiqə ərzində bişirdim. Pasta bişən müddət ərzində başqa bir tavada fraiché qaymağın üzərinə xırda şəkildə doğradığım yumurtanı (istəyə uyğun şüyüd və təzə soğanları) əlavə etdim. Azca qarışdırıb üzərinə çoxlu istiot səpdim və aşağı hərarətdə ərzaqlar tam isitləşənədək bişirdim. 

Pastanı süzüb sosun üzərinə əlavə edib bir neçə dəqiqə qarışdırdım.

Servis edərkən pastanın üzərinə doğradığım qızıl balığı və sürtgəcdən keçirilmiş holland pendirini əlavə etdim.

Nuş olsun!

photos © vhsoy

Tikə fajita

"Fahita" kimi tələffüz olunan bu Meksikan yeməyi adətən lavaşa bükülərək yeyilir. Hazırlanıb bişirilməsi asan olan və az vaxt aparan bu yeməyin tərkibi aşağıdakı kimidir:

350-400 qram uzunsov doğranmış tikə ət, aypara şəklində doğranmış 1 iri soğan,  1diş əzilmiş sarımsaq, uzunsov doğranılmış 1 yaşıl və 1 qırmızı bolqar bibəri, yarım çay qaşığı xırdalanmış raziyənə + darçın + zəncəfil, 1 çay qaşığı doğranmış keşniş, 2 çay qaşığı limon suyu, 1 xörək qaşığı zeytun yağı, istiot və ya istəkdən asılı olaraq doğranmış yaşıl acı bibər

Geniş bir tavada yağı isidib ətləri əlavə edib 10 dəqiqə ərzində qızartdım. Üzərinə soğan və sarımsağı qatıb daha 5 dəqiqə sote etdim. Daha sonra bolqar bibərlərini, ədviyyatları, keşnişi və limon suyunu da əlavə edib yenə 5 dəqiqə bişirdim.

Nuş olsun!

photos © vhsoy

Yaşıl salat

Yaz fəslini daha da rəngarəng etmək istəyirsinizsə bu salatı hazırlayıb dadmağı məsləhət görürəm. 

Salat: 100 qram uzun düyü, 100 qram dondurulmuş ispanaq, doğranmış 2 təzə soğan, 1 xörək qaşığı cəfəri, azca duz və istiot
Sos: yarım çay qaşığı duz, istiot, yarım çay qaşığı xardal, yarım çay qaşığı şəkər tozu, 6 çay qaşığı alma sirkəsi, 90 ml zeytun yağı 

İspanağı əridib mümkün qədər suyu çıxana qədər sıxdım və dərin bir qaba qoydum. Üzərinə xırda doğradığım təzə soğan, cəfəri, duz istiotu əlavə etdim. Sonra sos və adi qaydada süzdüyüm düyünü isti şəkildə qatıb yaxşıca qarışdırdım. Salatı soyuması üçün kənara qoydum. Tam soyuduqdan sonra soyuducuda bir neçə saat saxlayıb servis etdim.

Nuş olsun!

photos © vhsoy

Bulqur və mərci plovu

Az kalorili xörəklər silsiləsindən yeni bir təam :)

Tərkibi: nazik doğranmış 1 orta soğan, 2 diş əzilmiş sarımsaq, 1 çay qaşığı raziyanə, 1 stəkan bulqur buğdası, 1 stəkan yaşıl mərci, 120 qram doğranmış göbələk, 3 stəkan yarım toyuq bulyonu və ya su, zeytun yağı, duz və istiot (reseptdə olmasa da istəyə uyğun 100 qram doğranmış toyuq filesi)

Zeytun yağını dərin tavada isidib soğan, sarımsaq və raziyanəni əlavə edib bir neçə dəqiqə qızartdım. Üzərinə bulquru əlavə edib bulqur azca tündləşənədək daha 2-3 dəqiqə qarışdırdım. Bulyon, toyuq əti, göbələk və mərcini əlavə etdim. 

25-30 dəqiqə ərzində aşağı hərarətdə bulqur və mərci yumşalıb su çəkilənədək bişirdim. (Qeyd. Lazım gələrsə artıq bulyon və ya su əlavə etmək olar)

Duz və istiot əlavə edib yaxşıca qarışdırdım və xörək hazır oldu.

Nuş olsun!

photos © vhsoy

Badımcan dolması

Bu gün təqdim etdiyim ikinci yemək badımcan dolmasıdır amma bizim bildiyimiz badımcan dolmasından fərqlidir. Resepti gotürdüyüm kitabda Aralıq dənizi sahili ölkələrinə məxsus təam olduğu vurğulanmışdı. Tərkibi aşağıdakı şəkildəki kimi:

2 badımcan, 1 xırdalanmış orta soğan, 250 qram çəkilmiş mal əti, 1 çay qaşığı kəklikotu, 1 xörək qaşığı cəfəri, 3 xörək qaşığı quru çörək qırıntıları (suxari), 1 diş sarımsaq, 1 xörək qaşığı tomat püresi, 50 qram sürtgəcdən keçirilmiş holland pendiri, 1 halqa şəklində doğranmış pomidor, zeytun yağı, duz və istoit

Sobanı 200 dərəcə isitdim. Badımcanları uzununa iki hissəyə bölüb üzərinə duz səpdim və hər badımcanın üzərinə 2 çay qaşığı zeytun yağı əlavə edib 25-30 dəqiqə müddətində sobada bişməyə qoydum. 

Ayrı tavada soğanı zeytun yağında 4-5 dəqiqə sote etdim. Üzərinə mal ətini əlavə edib bişirdim. 

Badımcanlar 25-30 dəqiqə ərzində yumşalıb hazır olduqdan sonra sobadan çıxarıb içlərini qaşıqla götürüb mal əti və soğan qarışığına əlavə edib 2-3 dəqiqə bişiridim. Sonra kəklikotu, cəfəri, çörək qırıntıları, sarımsaq, tomat püresi, duz və istiotu əlavə edib daha bir neçə dəqiqə qarışdırdım. Alınan qarışığı badımcanların içinə yığdım. Onların da üzərinə halqa şəklində doğradığım pomidorları düzdüm və holland pendiri səpdim.

Tavanı yenidən sobaya qoyub 15 dəqiqə və ya pendir əriyənədək bişiridm.

Nuş olsun!

photos © vhsoy

Göbələkli əriştə

Uzun müddətdir ki bloqumu yeniləyə bilmirdim. Bu münasibətlə iki təam yerləşdirəcəm bu gün bloquma. Birinci təam göbələkli əriştədir.  

(təəssüf ki cəmi 1şəkil yerləşdirə biləcəm)

Tərkibi: 200 qram doğranmış göbələk, 200 qram əriştə (quru), 1 xırdalanamış balaca soğan, 2 diş əzilmiş sarımsaq,  100ml tərəvəz bulyonu, 2 çay qaşığı tomat püresi, 1 çay qaşığı soya sosu, 2 xörək qaşığı xırdalanmış cəfəri, 1 çay qaşığı kəklikotu, duz və istiot

Qazanda soğan və sarımsağın üzərinə tərəvəz bulyonunu əlavə edib qazanın qapağını örtərək 5 dəqiqə bişiridim. Üzərinə göbələk (Qeyd. Eyni anda bu xörəyə müxtəlif növ göbələklər qatmaq olar. Mən sadəcə şampinyon göbələyindən istifadə etmişəm), tomat püresi və soya sosunu əlavə edib yenidən qapağı örtüb daha 5 dəqiqə bişirdim. (Qeyd. İstəkdən asılı olaraq xörəyə ağ və ya qırmızı şərab qatmaq olar)
Sonra qapağı götürüb maye yarıyadək buxarlanana qədər qarışığı qaynatdım. Cəfəri, kəklikotu, duz və istiot əlavə edib bir neçə dəqiqə qarışdırdım və hazır oldu.
Ayrıca bir qazanda duzlu suyu qaynadıb əriştəni 2-5 dəqiqə müddətində qaynatdım. Yaxşı süzdükdən sonra göbələkli qarışımı əriştənin üzərinə töküb qarışdırdım və təam hazır oldu.
Nuş olsun!

photos © vhsoy

Kartof qratin

On gündən artıqdır ki bloqumu yeniləmədiyimin fərqinə vararaq sizə asan və çox dadlı bir yemək təqdim edirəm. 

2-3 ədəd soyulub doğranmış orta boy kartof, 1 diş sarımsaq, 3 xörək qaşığı sürtgəcdən keçirilmiş holland pendiri,  1 stəkan yarım tərəvəz bulyonu, duz və istiot

Sarımsağı iki hissəyə bölərək sobayadavamlı qabın içərisinə bir neçə dəqiqə ərzində sürtdüm. Kartofların yarısını qaba düzüb üzərinə azca holland pendiri, duz və istiot səpdim. Üzərindən bulyonun yarısını əlavə etdim. Qalan kartofları da eyni qaydada düzüb holland pendiri, duz, istiot və bulyonla tamamlayaraq öncədən 200 dərəcədə isidilmiş sobaya bişməyə qoydum. Kartofların bişməsindən asılı olaraq 1 saat 15 dəqiqə və ya 1 saat yarım müddətində qratin hazır olur.

Nuş olsun!

photos © vhsoy

Kələm, yerkökü və albuxara salatı

Bu da ikinci salat:

Doğranmış bir xırda kələmin yarısı, 2 sürtgəcdən keçirilmiş yerkökü, yarım stəkan doğranmış albuxara (və ya quru üzüm), yarım baş doğranmış soğan (bu dəfə təzə soğandan istifadə etmişəm), 1 çay qaşığı sürtgəcdən keçirilmiş limon qabığı 

Bütün ərzaqları yaxşıca qarışdırıb salatı hazırladım. İstəyə uyğun olaraq üzərinə ilk salatda təqdim etdiyim sousdan da əlavə etmək olar.

Nuş olsun!

Toyuq və kahı salatı

İki salat resepti təqdim edirəm sizə bu dəfə. Əgər mənim kimi kalori ölçürsünüzsə, düşünürəm ki, faydalı olacaq.

Birinci salatım toyuq və kahı:

Bir kiçik parça qaynadılmış və doğranmış toyuq filesi, iri doğranmış bir neçə kahı yarpağı, sürtgəcdən keçirilmiş holland pendiri
Sous üçün: 100ml alma sirkəsi, 1 xörək qaşığı tomat püresi, 2 çay qaşığı soya sousu, 1 diş xırdalanmış sarımsaq, duz və istiot 

İlk öncə sous üçün lazım olan ərzaqları yaxşı qarışdırdım. Sonra toyuq, kahı və pendiri bir neçə dəqiqə qarışdırıb üzərinə sousu əlavə etdim.

Nuş olsun!

Ratatuy və ya həftəbecər :)

Vüsal həmişə deyirdi ki, Ratatuy adlı yemək mütləq mövcüddur, mənsə onu inandırmışdım ki, bu, sadəcə cizgi filmidir. Lakin yeni aldığım bir neçə yemək kitabında bu yeməyə rast gəldikdən sonra Vüsalın haqlı olduğunu anladım :) 

Ratatuy adını gördükdə fərqli bir yemək olacağını düşündüm, resepti oxuduqca gördüm ki, bildiyimiz həftəbecərdən çox az fərqlənir. Amma çox dadlı idi. Tərkibi aşağıdakı kimi: 

1 iri badımcan, 1iri kabak, 1 iri soğan, 1 qırmızı bibər, 1 yaşıl bibər, 2 pomidor, 1 diş xırdalanmış sarımsaq, 2 xörək qaşığı keşniş yarpağı, 1 xörək qaşığı tomat püresi, duz və istiot

Badımcan və kabakı yuxarıdakı şəkildəki kimi iri hissələrə doğrayıb duzladım və yarım saatlıq kənara qoydum. Bu vaxt ərzində bibərləri uzunsov, soğanı yarımhalqa və pomidoru qabığını soyaraq xırda formada doğradım. Yarım saatdan sonra badımcan və kabakları soyuq suda yaxşı yuyub mətbəx kağızının üzərinə qurumaları üçün düzdüm. 

İri tavada zeytun yağını isidib badımcan, kabak, bibər və soğanları əlavə edib arabir qarışdıraraq 10 dəqiqə bişirdim. Sonra pomidor, keşniş yarpağı, duz və istiot qatdım və tərəvəzlərdən ayrılan su qaynayanadək tez-tez qarışdırdım. Nəhayət tomat püresini də əlavə edib tavanın qapağını örtərək yarım saat aşağı hərarətdə bişməyə qoydum. Sonra qapağı götürərək daha 10 dəqiqə bişirdim və ratatuy hazır oldu.

Nuş olsun!

photos © vhsoy

Flamand üsulu mal əti

Keçən günlərdə rast gəldiyim bu resept fərqliliyi ilə diqqətimi cəlb etdi. 

Flamandların tarixi VI-VII əsrlərə kimi dayanır və əsasən Belçika və Fransa ərazisində yaşayıblar. Hal hazırda Belçikanın almanca danışan əhalisinin dili flamand adlandırılır. Onların bu maraqlı yeməyini sizinlə də bölüşürəm. Hazırlanması və bişməsi ümumilikdə 3 saatadək vaxt aparacaq bu təamın tərkibi aşağıdakı kimidir:

Hərəsi 200 qram olan 2 mal əti parçası, 2 doğranmış soğan, 4-5 ədəd doğranmış göbələk, 2 xörək qaşığı un, 1 çay qaşığı şəkər, 200 ml pivə, 200 ml mal əti bulyonu, yarım stəkan keşniş yarpağı, yarım stəkan ispanaq, 4 dilim çörək, duz və istiot

Mal ətlərini ortadan iki hissəyə böldüm və 4 tikə alındı. Onları soba tavasında (əslində sobaya davamlı saxsı qazanda bişirmək lazımdı, mənim elə qazanım olmadığı üçün soba tavasını seçdim) qazın üstündə və yüksək hərarətdə zeytun yağında hər iki tərəfi tündləşənədək qızartdım. Sonra ətləri kənara qoyub qazın hərarətini nisbətən azaldıb eyni tavaya soğan və göbələkləri əlavə edib soğanlar yumşalanadək bişirdim. Tavanı qazın üzərindən kənara çəkib un və şəkəri qarışıma əlavə edib bir neçə dəqiqə qarışdırdım. Yenidən tavanı qazın üzərinə gətirib daha 1 dəqiqə qarışdırdım və tədricən pivəni əlavə etdim. Pivə qaynamağa başladıqda ətləri yenidən tavaya qoyub üzərinə bulyonu tökdüm. Keşniş və ispanaq yarpaqları və duz-istiot da üzərindən əlavə edib 160 dərəcə öncədən isidilmiş sobaya tavanın qapağını örtərək bişməyə qoydum.   

 1saat yarımdan sonra tavanı sobadan çıxartdım. Hər bir ət tikəsinin üzərinə bir dilim çörək qoydum. Çörəklərin üzərinə zeytun yağı (əslində çörək dilimlərinin üzərinə kərə yağı çəkmək lazımdır) əlavə etdim və qapaqsız tavanı daha bir yarım saat bişməyə qoydum.

Nuş olsun!

photos © vhsoy

Karamelli peçenye topları

Anamın tez-tez hazırldığı bu şirniyyatı çox sevdiyim üçün imkan olduqca mən də çalışıram ki hazırlayım.  Cəmi 15 dəqiqə vaxt alır.  

Tərkibi: 130 qram xırdalanmış peçenye, yarım banka karamel (qaynadılmış qatılaşdırılmış süd), 50 qram kərə yağı

Peçenye, karamel və yağı xəmir kimi qarışdırdım və alınan tərkibi top formasında yumrulayaraq hazırladım.

Nuş olsun!

photos © vhsoy

Pendirli brokoli

Bu dəfə sizə vegetarian yeməyi təqdim edirəm. Bol pendirli bu təam çox doyumludur. Tərkibi belədir:

Doğranmış 1 orta boy brokoli, 1 iri doğranmış soğan, 50 qram un, 300ml süd, 100 qram kub şəklində doğranmış ağ (mozzarella) pendir, 100 qram xırdalanmış göy pendir, 1 ədəd doğranmış qırmızı bibər, 100 qram sürtgəcdən keçirilmiş holland pendiri, duz və istiot

Qaynayan duzlu suda brokoliləri yumşalanadək 10 dəqiqə ərzində qaynatdım və süzüb soyuması üçün kənara qoydum. Eyni zamanda başqa bir qazanda soğanı 3-4 dəqiqə ərzində yumşalanadək qızartdım. Üzərinə unu əlavə edib qarışdırdım və qazın üzərindən kənara çəkib qarışdıra-qarışdıra südü əlavə etdim. Soğan və süd tam qarışdıqdan sonra qazanı qazın üstünə gətirib süd qaynayıb qatılaşanadək qarışdırdım. Üzərinə ağ və mavi pendiri, qırmızı bibəri, duz və istiotu əlavə edib qarışdırmağa davam etdim. Daha sonra soyumuş brokoliləri də əlavə edib daha bir neçə dəqiqə tərkib yaxşı qarışanadək qarışdırdım. 

Alınmış qarışığı soba qabına əlavə edib üzərinə holland pendirini tökdüm və 200 dərəcə öncədən isidilmiş sobaya 10-15 dəqiqə müddətində bişməyə qoydum. 

Nuş olsun!

photos © vhsoy

Lobyalı gül kələmi şorbası

Bu gün sizə yeni bir şorba təqdim edirəm. Həm ləzzətli həm də xeyirli olan bu şorbanın tərkibi aşağıdakı kimidir:

1 kiçik gül kələmi, 1 orta baş doğranmış soğan, 1 diş sarımsaq, 400 qram konservləşdirilmiş ağ lobya, 1litr tərəvəz bulyonu və ya su, yarım stəkan keşniş yarpaqları, duz və istiot

Soğan və sarımsağı zeytun yağında 5 dəqiqə ərzində bişirdim. Üzərinə gül kələmi, lobyanın yarısını və bulyonu əlavə edib qaynamağa qoydum. Qaynadıqdan sonra qazın hərarətini azaldıb 10 dəqiqə ərzində gül kələmi yumşalanadək saxladım. Sonra şorbanı blenderdə qarışdırıb yenidən qazana qaytardım. Lobyanın qalanını da üzərinə əlavə edib keşniş yarpaqları, duz və istiot qataraq aşağı hərarətdə bir neçə dəqiqə bişiridm. Şorba hazır oldu.

Nuş olsun!

photos © vhsoy

Soğan piroqu

Bu yaxınlarda aldığım maraqlı yemək kitablarından birində ani olaraq diqqətimi cəlb edən bu təama rast gəldim. Bişirdikdən sonra seçimimdə yanılmadığımı görüb resepti sizinlə bölüşmək istəyirəm:

Tərkibi: 1) Xəmir: 175 qram un, yarım çay qaşığı duz, 100 qram kərə yağı və 1 yumurta sarısı
2) İçi: 3 orta soğan, 1 çay qaşığı un, 2 ədəd qarışdırılmış yumurta, 50 qram sürtgəcdən keçirilmiş holland pendiri, 100ml qaymaq, duz və istiot

Öncə xəmiri hazırladım. Bunun üçün unla duzu qarışdırıb yağı əlavə etdim və un çörək qırıntısına oxşayanadək sürtələdim. Sonra una yumurta sarısını və 3-4 çay qaşığı su qatıb bərk xəmir əmələ gələnədək yoğurdum və üzərini örtərək 30 dəqiqəlik kənara qoydum.

Piroqun içi üçün aypara şəkilində doğradığım soğanları yağda 10-12 dəqiqə ərzində yumşalanadək bişirib soyuması üçün kənara qoydum.

Hazırladığım və yumru formada açdığım xəmiri soba qabının içinə yaydım və üzərini yağkeçirməz kağızla örtüb 200 dərəcə öncədən isitdiyim sobada 15 dəqiqə müddətində bişməyə qoydum. 15 dəqiqə sonra kağızı üzərindən götürüb və sobanın hərarətini 180 dərəcəyədək azaldıb daha 5 dəqiqə bişiridm.

Kənarda soyumuş soğanları un, yumurtalar, pendir, qaymaq, duz və istiotla qarışdıraraq xəmirin üzərinə əlavə edib sobanın hərarətini yenidən 200 dərəcəyədək artıraraq bişməyə qoydum.

25-30 dəqidə ərzində piroq hazır oldu. Nuş olsun! 

photos © vhsoy

Keşnişli yerkökü şorbası

Əlvan şorbalar seriyasının davamı olaraq bir neçə gün öncə bişirdiyim yerkökü şorbasını təqdim etmək istəyirəm sizə. Hazırlanması son dərəcə sadə olan şorbanın tərkibi belədir: 

Yarım baş doğranmış soğan, 2 ədəd xırda kartof, 4 ədəd yerkökü, 800ml toyuq bulyonu, yarpaqları saplağından ayrılmış 2-3 çay qaşığı keşniş, 100 ml süd, duz və istiot

Soğanları yağda 3-4 dəqiqə ərzində yumşalanadək qızartdım. Üzərinə kub şəklində doğradığım kartofları əlavə edib bir neçə dəqiqə saxladım və doğradığım yerköküləri də qataraq 3-4 dəqiqə qarışdırdım. Qazanın ağzını örtərək aşağı hərarətdə 10 dəqiqə ərzində bişməyə qoydum. Arabir ərzaqlar bir-birinə yapışmasın deyə qarışdırırdım. Sonra bulyonu əlavə edib qaynatdım və qazanın qapağı yarı qapalı şəkildə daha 10 dəqiqə saxladım.

Başqa balaca qazanda keşniş yarpaqlarını yağsız 2 dəqiqə ərzində qovurdum və soyuması üçün kənara qoydum.

Hazır olmuş şorbanı blenderə töküb bir neçə dəqiqə qarışdırıb təmiz qazana əlavə etdim. Üzərinə südü, keşnişi, duz və istiot əlavə edib 2-3 dəqiqə aşağı hərarətdə bişirdim. Şorbam hazırdır. 

Nuş olsun!